17 SAYLI YASAMAL ÜÇÜNCÜ SEÇKİ DAİRƏSİNİN DEPUTATI

Qalib Ordunun Qarabağ paradı

Bu gün Mətin Ordumuzun Müzəffər Ali Baş Komandan İlham Əliyevin rəhbərliyi ilə Vətən müharibəsində qazandığı möhtəşəm qələbəyə həsr olunmuş paradı keçiriləcək. Xalqımıza və dövlətimizə bu qələbəni yaşadan, 30 illik torpaq həsrəti və nisgilinə son qoyan cəsur zabit və əsgərlərimizi, onların məharətlə istifadə etdikləri modern silahları bir daha görəcəyik. Erməni işğalçılarını torpaqlarımızdan qovan Rəşadətli Ordumuza ehtiramımızı bildirəcəyik, qazilərimizə sağlamlıq diləyib, canlarını bizə görə qurban verən şəhidlərimizə Allahdan rəhmət diləyəcəyik. Allah rəhmət etsin!

Bu gün məğlub Ermənistanın döyüş meydanından qaçan hərbçilərinin qoyub getdikləri silah-sursat və texnikalar nümayiş etdiriləcək. Ermənistan ordusu tək itirilmiş canlı qüvvəsi ilə deyil, həm də sıradan çıxardığımız, yaxud qənimət götürdüyümüz silahı ilə birlikdə məhv olub. Ali Baş Komandanın dediyi kimi, Ermənistan ordusunu məhv etmişik!

Paradı Prezident cənab İlham Əliyevlə yanaşı qardaş Türkiyənin Cümhuriyyət başçısı Rəcəb Tayyib Ərdoğan da seyr edəcək. Döyüşçülərimizlə çiyin-çiyinə Türkiyə Silahlı Qüvvələrinin hərbçiləri də tribuna önündən keçib qardaş Azərbyacana dəstək və birlik mesajları verəcəklər

Bu parad Vətən müharibəsindəki qələbəmiz kimi tariximizə düşəcək. Gələcək nəsillər bu günlə fəxr edib qəhrəman oğullarımızdan nümunə götürəcəklər. Eşq olsun Azərbaycan Ordusuna! Yaşasın Türkiyə-Azərbaycan qardaşlığı! Yaşasın Ali Baş Komandanlarımız! Qarabağ Azərbaycandır!